Район 80 çул тултарнă май тĕп библиотекăн вулав залĕнче Лаврентий Таллеров çуралнăранпа 90 çул çитнине халалласа «Ан сÿнтĕр чун çути» литература каçĕ иртрĕ. Лаврентий Васильевич — чăваш çыравçи, СССР Писательсен союзĕн членĕ, Чăваш АССРĕн тава тивĕçлĕ культура ĕçченĕ, Чăваш АССРĕн халăх писателĕ, Çемен Элкер ячĕллĕ преми лауреачĕ. Вăл 1929 çулта Нĕркеç ялĕнче çуралнă. Л.Таллеров — паллă прозаик, очеркист, публицист, куçаруçă, журналист. Вăл «Октябрь ялавĕ», «Коммунизм ялавĕ» хаçатсенче, «Тăван Атăл» журналта ĕçленĕ, Чăвашрадио корреспонденчĕ пулнă.
Юбилейлă мероприятие Комсомольски 1-мĕш вăтам шкулĕн 6-мĕш «б» класĕнче вĕренекенсем /учителĕ — С.А.Жукова/ тата библиотека вулаканĕсем хутшăнчĕç. Валентина Боровкова тата Елена Васильева библиотекарьсем Лаврентий Васильевичăн пурнăçĕ тата пултарулăхĕ çинчен каласа пачĕç, электронлă презентаци кăтартрĕç.
Нĕркеç вăтам шкулĕнче ăс пухакан Юрий Вороновпа Марианна Яковлева /ертÿçи — Н.К.Ефремова/ çыравçăн «Пурăнма вĕрентмĕр-ши?» хайлавĕ тăрăх сценка лартса пачĕç. Л.Таллеровăн кулăшла калавсем нумай. Вĕсенчен пĕринпе — «Култарам-ха арăмран» ятлипе куракансене Инна Ядрова паллаштарчĕ.
Пуçтарăннисем «Ячĕ халăх асĕнче» кĕнеке куравĕпе паллашрĕç, унта çыравçăн чи паллă кĕнекисем кĕнĕ. Çав шутра: «Сăпка юрри», «Çăлтăр витĕр çул курăнать», «Хĕвелçаврăнăш — ылтăн çÿç», «Хурăн шывĕ», «Эрхип мăнукĕ Эрхип» тата ыттисем те. Юлашкинчен пуçтарăннисем «Пирĕн ентеш — пултаруллă çыравçă» викторинăна хутшăнса хăйсен пĕлĕвне тĕрĕслерĕç.
Палăртмалла: Лаврентий Таллеровăн кĕнекисем сентресем çинче тусанланса выртмаççĕ, вĕсем пире тăван чĕлхене, тăван халăха юратма, хисеплеме вĕрентеççĕ.

Е.ВАСИЛЬЕВА,
В.БОРОВКОВА.