Комсомольски район администрацийĕн вĕрентÿ пайĕ вĕрентекенсем валли тĕрлĕ конкурс ирттерсех тăрать.

2018 çулхи раштав уйăхĕн 1-мĕшĕнчен пуçласа 21-мĕшĕччен  чăваш чĕлхипе литератури вĕрентекен учительсем валли И.Я. Яковлев çуралнăранпа 170 çул çитнине халалласа «Кĕскен каласа нумай пĕлтерер» конкурс иртрĕ. Конкурсăн тĕп  тĕллевĕ – чăваш чĕлхипе литературине тата вĕсене вĕрентмелли методикăна пĕлекенсене тупса палăртасси, çĕнĕ технологисемпе вĕренÿ ĕçĕнче усă курас хăнăхăва малалла аталантарасси.

Конкурс тĕрлĕ номинаципе иртрĕ:

«Чи лайӑх плакат (листовка, программа, тĕрлĕ хыпар тата ытти те)»;

«Чи лайӑх афиша (пĕлтерÿ);

«Чи лайӑх буктрейлер»;

«Чи лайӑх буклет»;

«Чи лайӑх социаллӑ реклама»;

«Чи лайӑх видеоролик»;

«И.Я.Яковлев тата унăн вĕренекенĕсем» темăпа çырнă чи лайăх синквейн;

«Лингвистика терминĕ» темăпа çырнă чи лайăх синквейн;

«Литературоведени терминĕ» темăпа çырнă чи лайăх синквейн.

«Кĕскен каласа нумай пĕлтерер» конкурса пĕтĕмĕшле пĕлÿ паракан вĕренÿ организацийĕсенче тăрăшакан  19 вĕрентекен хутшӑнчӗ.

   Жюри членĕсем конкурса тăратнă ĕçсене пăхса тухса хак пачĕç, çĕнтерÿçĕсене палăртрĕç. Плеткина Н.И. (Нĕркеç шкулĕ), Ефремова Н.К. (Нĕркеç шкулĕ), Шингалова Т.А. (Тăманлă Выçли шкулĕ), Абрамова Л.П. (Комсомольскинчи 2-мĕш шкул), Индюкова С.Г. (Комсомольскинчи 2-мĕш шкул), Ефимова В.С. (Кĕçĕн Çĕрпÿел шкулĕ) , Владимирова Л.Н. (Хырай Ĕнел шкулĕ), Кокшина И.Н. (Хырай Ĕнел шкулĕ), Данилова Л.И. (Хирти  Мăнтăр шкулĕ), Филиппова Н.В. (Анат Тимĕрчкасси шкулĕ), Никифорова Л.И. (Хирти Явăш шкулĕ), Ермолаева Т.Ю. (Чурачăк шкулĕ) ĕçĕсене пысăка хурса хакларĕç. Ăмăртăва хутшăннă вĕрентекенсене тав туса малашне те ăнăçу сунатпăр.